黃勁連台譯 [數念「小 雅 園」]
我的老父吳新榮，雖然離開「小雅園」都四十年啦！但是在阮的心肝內總是感覺伊干礁[kan-nā]是一時離家遠行。三不五時故鄉的朋友攏會帶來伊的消息；在各地方文藝營或是學術會議的場所談論著「鹽分地帶文學」的時，總會提著伊的名字、阿咾[o-ló]伊的歌詩，若親像伊又閣遠行轉來[tńg—lâi]。對[tuì] 1933年在「小雅園」聚集[tsū-tsi̍p]北門區鹽分地帶文學青年以來，歷經七十多年，愈來愈濟[tsē]的文人雅士知影「鹽分地帶文學」，但是那親像袂記得早前文藝青年經常會集談文論藝的「小雅園」。佇這擺日記全集出版的時，我欲請逐家[ta̍k-ke]閣倒轉來詩人的家園行一擺。
我的老父吳新榮，1907年出世佇台南縣將軍鄉。1925年負笈[hū-ki̍p]東瀛，去日本留學，1932年底，父親唯東京醫專學成歸台，佮[kah]母親毛雪芬結婚了後定居佳里鎮，懸壺[hiân-hôo]濟世，獻身醫療的空課[khang-khuè]佮文化活動，總共三十五年。戰前主導「鹽分地帶文學」參「台灣文藝聯盟」接頭，這[tse]是伊意氣風發的年代。真正是親像施懿琳教授在《吳新榮傳》所描述「伊創作的詩篇，一貫關懷農村社會，表現人道精神，反抗極權政治佮外來殖[si̍t]民者的國家資本主義，維護正義追求公理」。1942年所做《亡妻記》流露伊對亡妻真情的思慕，是一篇淒婉[tshe-uán]憂傷的台灣《浮生六記》」。可惜創作天地亦綴著[tuè-tio̍h]第二次世界大戰戰局的漸漸緊張的影響逼伊停頓落來。1943年7月，父親閣tshuā後母林榮樑。就按呢 [án-ne]閣開創另一番辛酸又閣歡樂的『小雅園』後站故事
日記內底時常提起的「小雅園」是父親一世人拍拼咧維護，而且予阮兄弟終身數念[siàu-liām]居住的家園。伊踮佇佳里的中心，「金唐殿」佮「善行寺」的南爿[lâm-pîng]，是當年佳里病院（小雅園之東），現此時新生病院（小雅園之南）的後院。阿公吳萱草[suan-tshó]佇1933年10月中，以別號「雅園」共伊號名「壹洞天的雅園」，彼時[hit-sî]著有柴起的病房佮八角亭。
1933年10月底父親將「雅園」改名為「小雅園」。伊四箍笠是用紅磚疊的籬笆（早年為柴籬笆）大約一萬平方呎的四角形的小林園。伊主要建築是「琑琅山房」佮「八角涼亭」以及1963年後的「世外居」。山房佇小雅園的北爿，1942年父親為著紀念先母才將病房改名做「琑琅山房」，佇遮[tī-tsia]伊以日文寫〈亡妻記〉，發表佇當年的《台灣文學》。佳里本身是西拉雅族之一的原鄉，古早叫「蕭壠」[siau-lâng]，「琑琅」是「蕭壠」的諧音，父親著家已號做「琑琅山房主人」。這年12月山房整修好勢，方便一寡家人唯租的病院房間搬來居住，猶原保留「西間」的病房。「中間」的北爿壁堵[piah-tóo]頂面的小柴龕[kham]供奉[kiòng-hōng]先母遺像。1951年了後山房改做三間，「西間」做睏房佮冊房，「東間」做囝仔的睏房。「中間」本底是父親的冊房，後來改做囡仔的冊房。北爿的壁堵後來設案架供奉著觀世音菩薩、彭祖[phênn-tsóo]。正手爿的壁龕猶原供奉著先母遺像、神主牌。下面窗仔兩爿有ㄧ幅[pak]竹雕對聯「鐵肩擔道義」、「辣手著文章」。琑琅山房大門頂掛著一面古老[kóo-nóo]的花樟木匾[bo̍k-pián]，頂面浮雕著——「小雅園」。佇山房正南爿大約五十呎的所在有一座八角型柴起的涼亭，這座涼亭的東、西、南、北各角落有三級岑仔[gim–á]，用紅磚仔鋪一公尺闊的小道各聯接北爿的「琑琅山房」佮東爿的「佳里病院」。伊四面用柴圍牆，中央有八角形磨石桌佮圓形磨石椅，這是阮囝仔時代咧耍[sńg]、佚陶[thit-thô]的所在，夏天時拄著好天，定定[tiānn]佇遮請人客用餐。當年「鹽分地帶」文學青年參台灣南北二路的文友亦時常踮遮談文論藝。台灣文學界的朋友留落來怹[in]的跤迹亦留落來怹[in]簽名的親手筆，現此時收藏佇「國立台灣文學館」裡[lin]。
1947年10月19日，父親離開烏牢[oo-lô]轉來佳里，整修小雅園。將琑琅山房東北角開闢做菜園、豬稠[ti-tiâu]。的琑琅山房佮涼亭之間規劃做四塊花圃[hue-phóo]，各別以桂花、樹蘭、黃枝[軟枝黃蟬]、石榴[siā-liû](先父母佇將軍結婚紀念種樹，此時徙栽[suá-tsai]來小雅園)做中心，栽玫瑰、薔薇[tshiông-bî]、瓊花[khîng-hue]、孤挺花[koo-thíng-hue]、鳶尾花[ian-bué-hue]、茉莉[ba̍k-nī]、百合、日日春、扶桑[hû-song]、菊花、蘆薈[lôo-kuè]、萱草[suan-tsuó](金針花)、化石草、變葉木、鴨拓草、虎尾蘭佮白色葱蘭。夏天時，阮常踮龍眼樹頂黏蟬仔[siân-á]，蓮霧樹頂捉金龜[kim-ku]。阮老父為著欲紀念阮老母毛雪芬，親手栽「毛柿[môo-khī]」，每擺若到秋天尾仔，朱朱紅發毛的柿仔生甲累累墜墜[luí-tuī]，空氣中散發幽幽的清香。涼亭仔向南的所在有一个予葡萄旋藤的棚仔[pênn-á]，大人會當觀賞生葉、開花的景緻[kíng-tī]，囡仔會當就近觀察花蕊結子的生態，向望[ǹg-bāng]早一日吃著甜甜毋是酸酸的葡萄。三月裡，白柚子佮文旦花開的時總是暗香浮動，使人難忘[lân-bông]。每一擺到了秋尾仔就看會著下下[kē-kē]墜墜，頭tàm-tàm的白柚。在菝仔[pua̍t-á]、釋迦[sik-ka]、楊桃、檸檬、桔子、棗子[tsó-á]、檨仔[suāinn-á]、木瓜‧‧‧的樹影[tshiū-ńg]下跤，不時看著行來行去洽洽叫[ka̍p-ka̍p-kiò]的番鴨、展翼[thián-si̍t]示威的火雞、雞母tshuā雞仔囝、山羊仔咩咩叫[me̍h- me̍h -kiò]，狗仔綴前綴後[tuè-tsîng-tuè-āu]。阮兄弟仔佇遐[tī-hia]佚陶[thit-thô]，辦公家伙仔、騎三輦[lián]車、用水灌肚杜伯仔[tō-peh-á]、咬蟋蟀仔、炕窯仔[khòng-ió-á]、拍矸轆[phah-kān-lo̍k]，真正是名副[hù]其實的兒童樂園。不管花樹是自然枯凋[koo-ta]、抑是[iah-sī]颱風掃過的斷枝殘葉，抑是拄著喜事的進前，通常父親會來檢閱[kiám-ua̍t]「小雅園」，真緊共伊蒔花[sī-hue]徙栽、修剪，在短短的時間予伊恢復美觀，尤其是予百花獻嬌媚[kiau-bī]來迎接阮兄弟姊妹的婚禮佮喜宴。「小雅園」的西南爿捌[bat]長期種過芎蕉[kin-tsio]，因為芎蕉吐葉為囝死，無的確父親心內咧想講袂使閣損斷[sńg-tn̄g] 琑琅山房的女主人，所以佇1955年改種鵝黃佮tàm綠直線條相交接的「七賢竹(金絲竹)」，亦有暗示退隱山林的意思。阮在中山公園伊的紀念銅像的後壁崘仔趨坪[tshu-piânn]亦種「七賢竹」，予伊會當陪伴先賢分享吟詩之快樂。
1950年的春天，發現伊有高血壓的症頭，因為彼當時[hit-tong-sî]的醫學猶無好藥會當控制治療，所以心肝內不時有中風的陰影。1951年琑琅山房室內重修，也在西爿原來的紅跤稠仔[âng-kha-tiâu-á]所在起雞舍。1957年11月，琑琅山房、涼亭攏用磚仔角來KHÔNG柱跤佮壁堵[piah-tóo]，順紲[sūn-suà]翻修厝頂，準備隔冬大兄結婚典禮通用。1963年年尾，父親利用「樂春樓」後壁的日本厝拆落來的枋仔料，在山房左手爿伸手原樣重建，共伊號名「世外居」，這[tse]著是父親在生最後三年完成《台南縣志稿》、《南瀛文獻》的睏房佮冊房，同時亦修繕了涼亭的厝頂。紲落[suà-lo̍h]來1964年4月佇樂春樓原位改建新生醫院。
1965年4月，父親共「世外居」做冊房的玄關號作「夢鶴莊」，使用多年的名號終仔有一个家[ke]，這是伊思考實現「建築之夢」以及「退而不休」的告別傑作。父親捌講「不斷咧建築，會當延年益壽」，所以一直甲伊過身進前，伊不停咧起病房，予阮兄弟仔嘛樂觀其成，可惜！天不從人願。1976年我們五个兄弟同時間在「小雅園」起厝，「小雅園」的景觀一時改變，「琑琅山房」「八角涼亭」、「世外居」參「果子樹」終仔行入歷史，但是永遠活佇阮的心肝內。
父親戰後因1947年「二二八事件」以及1954年「白色恐怖」期間，前後兩擺體驗當代菁英[tsing-ing]分子無法辟免[phiah-bián]的牢獄[lô-ga̍k]之災佮人性的屈辱。所以在一任縣參議員了後，伊著凊心[tshìng-sim]，伊熱情的革命之火差不多花[hua]去啦。接紲[tsiap-suà]伊又閣回歸轉來「文學的吳新榮」。戰前除去少數的漢詩以外，新詩以華文、台文、日文創作的[ex]總共有九十二首。1997年3月，由台南縣政府文化中心出版的《吳新榮選集》第二冊內底，編者對伊左派詩學早著有精闢[tsing-phik]的解析。呂興昌教授講「故鄉的輓歌」是父親用母語思考、書寫，上蓋會當表達農民心聲的一首詩；伊認定「思想」雖然用日文寫作，但是父親提醒詩人毋通放棄用母語來書寫咱的文學。陳芳明教授亦佇伊的論文指出「思想」可能上蓋有人生哲理又閣上蓋會當代表父親詩觀的一首詩。陳芳明教授佮黃琪椿先生攏指出「煙筒」是勞動者在資本家剝削[pak-siah]之下，心靈上蓋強烈的抗議。但是戰後以華文創作的干礁[kan-nā]三十六首。新詩的創作量因為欲伐過[hua̍h-kuè]語言的障礙，所以不如戰前。父親比較滿意的是〈讀「洪水」後〉。楊雲萍教授阿咾[o-ló]〈颱風〉已經達夠相當的水準，參王白淵的詩作比，袂較輸。
1948年7月9日，父親完成《震瀛自傳》(手稿現收藏佇國立台灣文學館)。1952年伊以這本冊做藍本[nâ-pún]，將文章所提現此食時猶原健在的[ex]，怹的名共伊換做共音[kāng-im]的假名，(這是戒嚴時期無可奈何、委屈求全的寫作)，「以親像長河小說寫法完成個人傳記的憶述[ik-su̍t]，亦是自己對性命歷程的全盤省視。」(同前施懿琳教授的引述)。父親認定這本冊會當替這个時代做見證，會使講是台灣土地上一个知識份子的「備忘錄」，嘛會使講是草地所在一個普通人所紀錄[ki-lio̍k]的生活史；這是父親生涯上蓋大型的作品。「1958年起將近十冬時間，〈琑琅山房隨筆〉系列的文章三十四篇，以中文做主体，參lâm台語、日語的俗語，寫物，或說理，或諷刺，在平淡的語言內底藏著[tshàng-tio̍h]伊心內的鬱卒[ut-tshut]、憤怒，隨著筆尖笑詼[tshiò-khue]的筆調，表現伊性格的特質」（同前施懿琳教授的引述）。1962年11月12日，台南縣鯤瀛詩社成立，他選著首任的會長。這段時間伊試寫漢詩，有想欲改革老古舊[lāu-kóo-kú]的傳統文學，但是無成功。1966年11月，伊出版在生唯一出版的著作[tù-tsok]《震瀛隨想錄》。這本冊總共也有三篇序文(伊每五冬寫一篇)，佇伊六十歲的生日完成，這是伊平生上蓋歡喜，亦是伊認定真有代表性的作品。其中收〈亡妻記〉、〈隨筆〉、〈詩歌〉、〈民俗〉、〈採訪〉等。但是可慮著時局關係，伊不得已提掉一寡左翼[tsó-i̍k]色彩的詩歌。在《震瀛隨想錄》的尾頁，有貼[tah]一張珍貴的「藏書票」，彼[he]印章是父親家已設計的[ex]，紙張是池田敏雄先生對日本寄來，日本民間國寶的手造的工藝紙。
紲落來談「文獻的吳新榮」。1952年11月12日台南縣文獻委員會成立。先父擔任文獻會的編纂組長，任內主要成果是《南瀛文獻季刊》(總共十二卷十八冊，1953年到1967年)、《台南縣志稿》(共十三卷，1955年到1965年)的編輯佮出版。前後十五冬，足寮 [liâu]落去做田野的調查，用雙跤實地去勘察[khàm-tshat]台南縣內的名山大川、名勝古跡，走訪當地耆老[kī-nóo]，採集第一手資料，彌補[mí-póo]過去文獻資料的不足、修正其中的錯誤。《南瀛文獻》的撰述[tsuān-su̍t]以及資料的匯集[huē-tsi̍p]是推動《縣志》成功的因素。《採訪錄》內底重要的著作，著是查訪南瀛的歷史紀錄，逐篇[ta̍k-phinn]攏是精采的報導文學。我三生有幸，會當綴先父參與[tsham-ū]多次的採訪，深深體會現場探查、求證成功的快樂。父親投入文獻的工作無閒甲頭毛白、目珠霧，食足濟艱苦；但是我了解伊內心是安慰的[–ê]，伊數十年如一日咧拍拼，才完成伊別號「史民」的任務。伊前後猶閣有編輯了吳萱草的《忘憂洞天詩集》、《鄭靜夫詩集》、《金唐殿善行寺沿革誌》、《南鯤鯓廟代天府沿革誌》等冊。
抑若[iah-nā]「醫師的吳新榮」，伊的醫療生涯相當單純。伊東京醫專卒[tsut]業，先佇東京貧民醫院服務半年，1932年回台了後，在散赤的鹽分地帶佳里做醫生，懸壺濟世，做一位盡責的「全科村醫」的角色。留日佮轉來台灣了後，發表〈社會醫學短論〉等作品會當看出伊社會醫學的理念。伊主張「醫藥分離」、「產兒制限」，是日據時代相當先進的真知卓見[tok-kiàn]。迄當時猶無衛生所的設立，所以防疫[hông-i̍k]的空課親像日本腦炎[náu-iām]、落吐[làu-thòo]、天花[thian-hue]的預防注射或種珠[tsìng-tsu]等，伊攏義務去做。有時一工愛注射五百針以上，尤其瘟疫[un-ia̍h]當咧流行期間，伊時常騎機車tsông東tsông西，走遍北門郡的草地所在；那親像拍火彼一樣，趕拂拂[kuánn-hut-hut]向前行，是人道主義精神的表現，使人感佩[kám-puē]。
戰後難能可貴的[ex]是父親佇1960年8月，邀請台南市三位醫師，來合作創立「新生聯合病院」，由伊本人擔任院長佮內科的診療空課。另外三位醫師負責外科、婦產科、小兒科。這是戰後參府城同步，會使講是鹽分地帶六鄉鎮創始[sí]的綜合醫院。雖然1964年年底，因為種種原因來結束，但是已經建立了今旦日「新生醫院」的良好基礎。伊拍拼咧爭取承辦公保、勞保的業務，但是因為傷[siunn]過疲勞，心力交瘁[kau-tsuī]，致使伊無法度實現退休寫作的心願。但是伊晚年[buán-liân]總是拍過一場美好的戰爭，實踐[si̍t-tsiān]先進醫療制度的建立；雖然有所不足，無符合醫院經濟效益的規模，實實在在咧「服務」社會的弱勢者─勞工，實現伊一生念念不忘欲創立「大眾醫院」的心願。
父親雖然離開阮已經四十年囉[loh]！但是伊的精神、影像永遠活佇阮家內大細的心中，總是感覺伊不時[put-sî]會對[tuì]伊的著作或相片走出來。當阮兄弟姊妹團圓聚[tsū]]會的時，攏會思念伊親身下廚[hā-tû]煮的「壽喜燒」，食起來[tsiah8–khi-lai5]鮮閣甘[tshinu-koh-kam]，以及tîm米糕、圍爐烘魷魚[hang-jiû-hî]、聽伊講故事迄種溫暖的情景。逐家定定[tiānn]提出父親醫療種種趣味的代誌，會使講是規牛車的[ex]，講也講，講起飼「紅跤」的故事
父親熱愛「紅跤」的靈性，欣賞操練、放「紅跤」飛轉來的心適[sim-sik]，而且伊確實利用「紅跤」來參患者通批，這款傳奇的代誌，庄跤人共伊當做笑談[tshiàu-tâm]。每一擺伊外出「往診」，看著庄頭插一枝紅色的旗仔，伊著入庄看診，待診察、注射的空課[khàng-khuè]做好勢；伊隨著「飛鴿傳書」，傳藥單轉來病院，予等待的患者家屬提得藥品緊轉去。接紲伊騎機車一庄拼過一庄，毋免半工，伊著看診二十幾戶，完成三○年代交通無方便，真困難的醫療任務。大概[tāi-khài]是「新西醫那神明」雅號的緣由之一啦！
會記得我七歲的時，拄拄仔[tú-á tú-á]第二次大戰中，空戰上蓋激烈[ki̍k-lia̍t]；小雅園亦曾經[tsîng-king]挖了四个大防空壕[hong5-khong-ho5]予家族、空襲的時通宓[bih]。飛行機[pue-lîng-ki]的聲、大人囡仔驚著的吼叫、掃射的聲、炸彈的爆炸聲，到目前彷彿[hóng-hut]閣佇我的耳空裡輾弄叫[lìn-lòng-kiò]、吱吱叫；可見彼當時的風聲鶴唳[hong-sing-ho̍k-lē]，逐家宓空襲的驚惶[kiann-hiânn]。有一工，父親用跤踏車載我對將軍庄欲轉來佳里，路裡拄著空襲，宓入大約仔二公尺深的防戰車壕溝。飛機飛走了後，我參父親爬半晡[poo]才爬出來，兩人相對看，滿身重汗，面糊塗[kôo-thôo]，實在好笑。囡仔時到讀初三這段時間，見若隔一個月，我就坐踮父親的跤頭夫，予父親修指甲[tsíng-kah]，搤耳空[iah-hīnn-khang]，彼[he]是上蓋溫暖的時刻。自從日據時代到戰後參與[tsham-ū]文獻工作的頭前，平常時仔若空課做煞，父親定定參朋友行[kiânn]圍棋。這[tse]是伊拒絕閣參損友[sún-iú]啉[lim]酒，拍麻雀了後上快樂的休閒[hiu-hân]活動，伊準備兩組厚六吋的紅檜[âng-kuè]棋盤佮光閃閃黑的白的磨石仔的棋子[kî-jí]；佇「琑琅山房」或是「小雅園」的樹影[tshiū-ńg]下跤，參親朋好友佇遐[tī-hia]戰起來，戰甲天地昏磅磅[hun-pōng]日月無光。阮兄弟仔踮邊仔[-–á]看，有樣看樣，也愛著這款磨練心智的遊戲。
1954年10月9日，我拄仔咧讀高一，阿兄，阿姊攏佇外口咧讀冊。無預警亦無說明因由，我竟然目珠金金看父親予兩箍[ln̄g-khoo]情治人員押去台北，彼時父親也無交代半句話，頭無越[ua̍t]向前行,親像從容赴義[tshiong-iông-hù-gī]。我的孤苦無助，內心強烈的震撼[tsìn-hām]驚惶[kiann-hiânn]，使我內心滾絞[kún-ká]那像大海起風湧，幾何工袂食袂睏。四個外月後，父親雖然平安對監牢[kann-lô]轉來。但是厝內大細已經內心受傷，無法度治療啦。
父親留下來的物件，予阮上蓋珍惜的是伊三十四年不斷咧書寫的「日記」以及伊用心搜集[soo-si̍p]的二千二百七十六張的相片(1912-1967)。在1953年到1966年所翕[hip]的歷史文物相片，會使講是伊的另外一部[phō]《文獻採訪錄》，總共也二百三十外張，其中有誠濟是已經消失的歷史文化遺跡[uî-tsik]。大部分的相片伊攏有註明時間、人物、地點，重現一頁頁使人感動的歷史鏡頭。父親愛翕[hip]短短的永遠搭近土地、人民去書寫「家園」，保存「延陵家族」的面容[bīn-iông]。阮嘉哉[ka-tsài]會當分享伊顧家[kòo-ke]、念家[liām-ka]、疼子孫至情至性的一面。伊好[hònu]文學，愛交友、歡喜旅遊、伊政治受難的傷痕、歷史文獻的印記；尤其是阮兄弟姊妹，唯滿月、四月、度晬[tōo-tsē]、出外讀冊、以及長大結婚，到伊晚年的含糖甘仔 [kâm-thn̂g-kam-á]弄孫。那親像行倒轉去時光的磅空[pōng-khang]，來夠現場，安怎看都袂嬗[siān]，時常予我不能自己[tsū-kí]。阮亦會當深深體會父親的用心，透過伊有力、溫暖的雙手，熱情的視窗，閣一擺溫習父親的愛，予阮的囝仔有永遠聽袂完的「小雅園」故事。
1942年3月27日，柚仔花當咧開的季節，母親毛雪三十歲著來過身[kuè-sin]；二十五冬後的1967年同月同日，父親去台北參加省醫師公會年會了後，雄雄心藏病發作，辭別人間。2007年農曆2月9日日這工，神明以三个上杯[siōnn-pue聖杯]設定做先父母的金甕仔[骨灰罈]採取共款[kāng-khuán]的時辰共款的方位，相隔壁安佇新起的延陵祖先靈堂。共伊換過來新曆正是3月27日。阮才[tsiah]領悟三擺的3月27日，是偌爾[luā-nī]神奇的日子！同時進前，佇1997年同月同日，台南縣政府為著欲感念父親對文學創作的堅持佮[kah]保存南贏文獻的貢獻，佇伊往生三十週年，特別在佳里鎮中山公園徛[khiā]伊的紀念雕像──伊親近鄉土，熱愛文學的詩人風采終結阮家族仔多年來的感傷。2007年11月12日，國立台灣文學館出版《吳新榮日記全集》，來慶賀紀念父親百年冥誕[pîng-tàn]。這又閣是阮厝內大細上蓋光榮佮[kah]安慰的日子。父親身為大家庭的長子[tióng-tsú]，揹[phāinn-tio̍h]]著重大的責任，亦擔擔[tam-tann]大家庭的經濟，承受[sîng-siū]誠大的精神壓力，是阮做人序細[sī-sè]的無法度去想像的，這恐驚仔是伊早早著來過身的原因？日記內底常常看著伊為家事咧操勞，伊是非常辛苦的一家之主啦！上蓋予人感心的是伊一世人無怨無悔咧養飼、教育小弟小妹、囝兒，這款的疼心予阮永遠感佩[kám-puē]。尤其是伊做人處世[tshú-sū]的忠厚、土直，遭受扭曲的時代加佇伊身上的凌辱[lîng-jio̍k]，予阮內心十分的毋甘[m̄-kam]。假設，伊若是活佇自由太平的社會，毋知偌好咧[luā-hó-le‧]！值得安慰的是伊的全身坐相[tsē-siòng]銅像徛[khiā]佇佳里中山公園了後，咱不時會看見伊的兩爿的大腿、跤頭夫金閃閃閣滑溜溜，阮就知影日時有囡仔來佚陶作伴，一定予伊袂感覺孤單嚄？！同時文學界的朋友文藝營的學生亦時常來朝拜，參汝翕[hip]像，相信九泉地下，汝亦會誠安慰才著[tsiah-tio̍h]！
Paradisic - 小雅園 2.0 