數念張炎憲教授

追悼台灣歷史國寶
唯面冊的報導，予我真早就知影張炎憲教授佇美國費城觸(tak)著心臟病的消息，原本按呢想這是美國定定咧發生的小病例，因為我家己佇2008年，捌雄雄發作心絞痛，到洛杉磯醫院急診，囥(khǹg)了七支支架踮(tàm)心臟冠狀動脈裏底，歸个手術過程干焦開一个半小時爾爾，所以當時聽著張教授破病掠準(lia̍h-tshún)無要緊；啥知影，隔工煞傳出伊已經裝了葉克膜的消息，毋才意識到病情並毋是我想像中樂觀！當離世的歹消息傳轉來的時陣，我雄雄著驚！不止仔傷心。
張教授比我較少九歲，煞佇人生上懸峰的時陣離開人世，予阮留落來無限的思念。伊一直盡心盡力為台灣史走tsông，半年來主持不止仔濟相關的台灣歴史講座，加添旅途厭siān，尾後肉身袂堪得，煞倒倒–落-去。
2014年10月19日，佇台北雙連教會舉辦張炎憲教授追思禮拜，我的第五小弟拄好是雙連教會教友，所以伊代表阮家屬參加。我觀賞彼工錄影的影片看規場追思會，超過千人來賓kā會場攏kheh甲欲爆開了，哀慼情緒瀰漫全場。
毋過，我聽著牧師按呢講：「張炎憲教授佇世間的任務已經完成，伊得欲轉去天家主的身軀邊，毋免傷心，顛倒愛kā伊祝福！」聖歌團隊用數念、呵咾(o-ló)、慰安、逐種的詩歌來合唱，親像發光的靈魂，化做千風，無形中撫慰了家屬佮大眾。逐家一定聽著足濟張教授的生平故事，這馬換我來講看覓，講我佮伊之間的因緣軼事(it8)。

緣起─蒐集歷史資料
有一工，吳樹民宗叔來台南佳里，伊建議阮Kā先父吳新榮的藏書、遺作保存佇「吳三連台灣史料基金會」裡，予遮的作品會當有效予人運用佇相關史學文學研究，阮嘛爽快答應。
接紲基金會委託張炎憲教授落南取件。猶會記得是1991年3月，張教授家己開車來阮厝兜─「小雅園」。伊平易近人，和藹(aì)可親，一身素樸的穿插以及敬業態度，予阮留落來足深刻的印象。以張教授的地位，其實會使請一个助理來鬥相共(kāng)，毋過，伊家己一个人Kā一千外本舊冊裝滿伊的汽車內底，無閒規工才打揲(tánn tia̍p)好勢。
見笑代！阮是「書香門第」，卻無囥入驅除冊蟲用的芸香草抑是臭丸，任由冊頁生出袂少的剪蟲，陣(tsun7)陣殕(phú[霉])氣，加添累積半外世紀的粉塵，無罩喙掩仔，規身軀滿滿是坱埃(ing-ia)；毋過，伊猶原一點仔無要意。彼當時阮拄好佇醫院門診咧無閒，煞袂記得伊一个人踮三樓的書櫃咧做工課，伊一再婉拒助手幫忙，面對千冊以上的舊冊，我有一點仔驚疑(kiann-gî)也真佩服，不知伊是按怎kā伊搬運–落-來的？凡勢伊的心目中有一个使命，掠準走揣、整理歷史資料是連鞭愛做的代誌，看伊急欲做的模樣，假那是愛趕緊kā收藏才會當解救台灣歷史，通傳承予後人。
張炎憲教授整理了阮爸的遺著，包括《1933-1967年日記》四十七冊、《此時此地》四冊、《亡妻記》乙冊、《採訪錄》兩冊、《兩地書》兩冊、《書信》兩冊、《震瀛回憶錄》的殘本等手稿，以及藏書一千零(khong3)三十四冊(內含精裝本的書報剪輯十二冊)，遮的資料目前攏珍藏佇「吳三連台灣史料基金會」裏底。設使彼當時若無張教授家己來接收這批文件，無定著閣過了幾代，遮的資料減彩會逗逗仔序(sī)失散抑是會拍損–無-去。

難忘的口述歷史經驗
受先父吳新榮生前熱愛文史的影響，我也對文獻採訪加減有興趣，阮好運得著張炎憲教授的邀請，做伙去訪談李鹿先生做口述歷史。 1993年8月29日，張炎憲教授、高淑媛小姐佮我做伙去台東訪問李鹿先生。彼當時高齡八十三歲的李鹿先生(1911-1996)，身體猶真勇健，會當清楚說明按怎對1947到1953年逃亡，彼咧中間加入台灣共産黨的頭尾。伊捌覕蹛(tuà)佇嘉義、臺南山區、屏東潮州逐跡走傱(tsông)，假裝擔擔(tann-tann3)賣「什細」、揹著磨刀器，佇庄跤磨刀或者是kā人剪頭毛來掩護；彼咧中間，伊也偷偷仔溜轉去學甲，生了屘查某囝。李鹿先生講到伊佇日治時期參加「農民組合」活動受難的情形，親像伊是英雄頭目，講甲喙角全波。
我佇訪談過程中，對伊提到參加農民組合的時陣，彼種怨恨殖民地政府的情緒，定定愛佮日本人盤撋（puânn-nuá）的代誌會當理解。毋過，卻對伊深受祖國的人來凌治的代誌無話無句，予阮想攏袂通。講a7講，伊不時發聲批評當時社會的不公不義，利劍劍的社會主義觀點，予阮不止仔驚疑。尾後伊講家己是因為自首好狗運逃過牢獄之災。佇訪談結束欲轉去的路–裡(lin3)，我講起：「除非伊做抓(liàu)耙仔有功勞；若無，總會濟少關幾日仔？」張教授真客觀咧講：「伊的說法減彩是對的！因為當時仔政治氣氛已經無遐爾緊張囉，何況彼當年覕佇嘉南一帶的台共份子攏總走了，死無對證。」我毋甘心追咧問講：「1954年10月，吳新榮閣一擺身落烏牢食櫳仔飯，伊夆掠的理由之一是1953年彼陣， 佇隆田火車站捌意外相拄，吳新榮煞無向面頂通報。想袂到伊講無『相拄』這款代誌。助伊逃難覕蹛的朋友也干焦有一、兩位受連累，敢有可能？伊訪談經歷的真實性予人憢疑？」張教授婉轉kā我講：「凡勢伊恐驚背叛朋友的罪名夆公開，毋才白賊的！」可見，張教授用歷史學者立場忠實記載彼當時的說詞，閣顧慮老歲仔的尊嚴，煞毋敢追問，充分表現張教授的仁愛慈悲！

謙卑君子風度

府城臺南自古以來，文風鼎盛，江山代代有傳人，為著紀念過去對藝文界有卓越貢獻的在地藝文人士，通做後世的典範。對1997年起，前臺南縣長陳唐山kā鹽分地帶詩人──吳新榮、吳晉淮（關仔嶺之戀作曲者）、顔水龍（台灣出名的美術家）分別佇 的故鄉設立紀念銅像。
先父吳新榮的紀念銅像佇佳里中山公園舉辦揭幕儀式的時，張炎憲教授代表「吳三連台灣史料基金會」來參加盛會，阮家屬邀請伊坐貴賓席。毋過，教授卻真客氣咧推辭，而且講：「咱攏是家己人！所以坐來賓席就好矣。」一直到這馬，逐擺見若想著伊的「文文仔笑」、充滿學者風範的招牌笑容，低調的態度，予人感覺十分的舒坦。伊無一般老學究的嚴肅，伊的學術地位「仰之彌高，鑽之彌堅」，確實袂使予咱憢疑的！

認真蒐集、謹慎保存史料
1999年7月，國立文化資產保存研究中心籌備處主任林金悔先生轉來故鄉，伊替「國立台灣文學館」的成立進行前置作業，並積極走揣作家的手稿佮相關資料。
先父生前歡喜請朋友佇伊特別攢(tshuân)好的真媠的簿子內底題字，假那寶貝收囥踮屜仔裡。阮誠毋甘Kā先父賰(tshun)–落-來上尾仔的遺物──四本簽字墨寳，贈送文化資產保存研究中心，通予遮的史料發揮閣較大的效果。
2003年，我對報紙看著「吳三連台灣史料基金會」董事張炎憲教授欲編輯《王添灯紀念輯》，想欲邀請各界人士提供王先生的遺墨。先父遐的簿仔本裡底拄好一本有王添灯先生的筆跡，我足歡喜報告張教授佮王添灯先生的查某囝王芬芳女士，才知影這是王先生受難進前存–落-來的唯一墨跡。
2004年，王芬芳女士邀請我到國立台灣文學館，做伙走揣伊的老父原件遺墨──「為最大多數，謀最大幸福」，這是先父佇1946年10月14日到台北訪問王添灯的時，委請王先生所題的毛筆字。
阮愛刷卡入去一間保持恆溫恆溼的地下儲藏室。文學館工作人員予阮白手套，足細膩掀開阮贈送文學館的簽名簿，我揣著原文彼一頁，猶袂翕像的時陣，王女士隨就目屎四淋垂矣！因為王先生受難的時陣，伊才四歲半爾爾，看著家己老爸的筆跡，內心感慨萬千。尾仔遮的字句就編印踮《王添灯紀念輯》的冊面。張教授講：「王先生佮吳新榮佇二二八進前所做社會秩序的重建志業，充分表示in攏有無私奉獻、改革社會的仝款理念。」
尾後我參加幾若擺文學講座，看著已經過身作家的家屬陸續捐出in的遺稿、藏書，先父的諸位好友楊雲萍、黃得時、楊逵、郭水潭、王詩琅、巫永福等攏總齊到囉，我天真請教張教授：「敢是會當Kā先父的著作、日記遺稿、藏書轉送予國立台灣文學館，因為Kā阮老爸孤獨囥踮基金會，袂當佮伊的好友團聚文學館，實在傷過孤單啊！」張教授真謹嚴應答：「吳新榮的遺稿、藏書已經是『吳三連台灣史料基金會』的財產，不便轉送。閣較重要的是：早前基金會捐袂少二二八原始資料予佇二二八公園內底的『二二八紀念館』；毋過，無偌久有部分資料phàng[拍毋]見啦！咱著愛閣再觀察看覓，知影敬畏歷史的人，才有資格收藏珍貴的歷史資料。」
老實講，阮足佩服張炎憲教授這款見微思遠的功夫，若欲保存史料的完整性佮減少遺失的風險，定著愛慎重小心，袂使干焦順家己意願，看前無顧後，一旦史料散佚，講實在，若欲面對先人就會見笑死囉！

主持《吳新榮日記全集》發表會
為紀念鹽分地帶詩人吳新榮百歲冥誕，國立台灣文學館委託「吳三連台灣史料基金會」，由張良澤教授擔任總編輯，出版《吳新榮日記全集》(1933-1967年共11冊) 。
2007年11月10日佇台北國賓大飯店舉辦《吳新榮日記全集》出版發表會，由前總統陳水扁、國立台灣文學館鄭邦鎮館長、吳三連台灣史料基金會吳樹民副董事長、濟位文學前輩、各級嘉賓佮家屬(吳新榮內外孫、橄欖孫20位)量約三百外人做伙參加盛會。這場發表會請當時擔任國史館館長的張炎憲教授主持，佇會中，伊肯定了日記記載歷史的「真實」佮「價值」的重要性，而且kā阮家屬鼓勵：「出版先人的遺作會當永久保存家族的記持，雖然伊干焦是台灣歷史的小小段落，但這是提供後人研究彼當時士紳生活佮衛生醫療的絕佳記錄。日記是一个人心肝窟仔底的告白，內底一寡話語減彩袂當佇公開埸合講出喙，感謝吳新榮家屬同意照原文出版，會當現出時代變遷上真實的見證。」阮家屬佇「歷史求真」佮「隱私」中間定著會頓蹬(tenn)–一-下，欲Kā先人無欲夆知影的祕密公開，也是著愛足大的勇氣。張炎憲教授的一段話親像安心丹，為著對學術研究有幫贈，阮也無反悔，贊成按呢做。

擔任《台灣史料研究》總編輯
張炎憲教授佇「吳三連台灣史料基金會」創辦《台灣史料研究》，目的是欲提供一塊會當做歷史耕作的田園，伊認為這才是活化台灣歷史的上好方法。
對1993年2月起出版第一號《台灣史料研究》雜誌以來，每半年久我攏固定會接到《台灣史料研究》，挖掘了真濟的珍貴史料，唯遐的我嘛得著袂少台灣歷史常識。無采今年六月出版第四十三號的《台灣史料研究》，想袂到是伊擔任總編輯上尾後的一集，實在夆掩卷吐大氣！

推動書籍、刊物數位化
《台灣風物》1951年12月創刊，自頭到尾攏總無斷去，伊是戰後民間上悠久的刊物，內容包含民俗、歷史、語言、台灣文化等有關文章佮珍貴圖片，是各界研究台灣史的一份重要刊物。1986年起，張炎憲教授開始接任《台灣風物》主編。為慶祝《台灣風物》創刊60週年，佮「吳三連台灣史料基金會」合作就kā逐年各卷期文章蒐整、掃描、建立數位化檔案，佇2012年11月正式對外開放。
我捌佇1967年3月，寫過一篇紀念先父吳新榮的文章─〈爸！你永在〉，刊登佇《台灣風物》，為了順應刊物數位化的潮流，2010年11月22日，張炎憲教授寄一份授權書來，我才知道這是一門大工程，因為愛斟酌走揣遮的猶原在世的作者，一一寄送授權書，著愛二步七仔的功夫才有法度達成的，毋但按呢，2013年張教授主持《吳新榮日記全集》電子數位化的工作，也是憑藉這款精神才接紲落去完成的，這看起來簡單其實足費工夫的任務，若無絕對的耐力佮熱心，是真歹順利進行成功！

致力於二二八歷史研究
佇政治忌剋(khi7-kat7)的年代，張炎憲教授上大的學術貢獻是，投入研究二二八事件佮戰後重大政治案件，積極走揣當事人、親友、目擊人，kāin完成口述訪談，保存了上珍貴的歷史見證。伊佇國史館長任內，特別強化「台灣主體」意識，陸紲整理出版包括雷震案、白色恐怖、二二八事件、台灣民主運動、台灣主權論述等相關史料佮研究。由張教授擔任召集人的「二二八事件紀念基金會真相研究小組」，佇2006年二二八前夕出版「二二八事件責任歸屬研究報告」，Kā二二八事件責任歸屬指向蔣介石，為國家所主導的二二八研究立下一座里程碑。
對「二二八事件」來講，基金會前後出版了十外本相關的口述歷史。「吳三連台灣史料基金會」出版台灣本土系列，第五十冊是「嘉義北回二二八」，當中就記錄了我陪張教授做伙去的李鹿先生口述歷史。伊過去曾整理過的濟濟歷史檔案，向望有心人會當繼紲傳承，毋通予伊苦心挖掘的歷史遺蹟，跋落踮時空荒崖中。

緣了─化做世紀的數念

台灣拄拄仔經歷一場充滿公民自覺的選舉，我按呢想：設使張炎憲教授親眼見證這場選戰，伊欲按怎記錄這段歷史？太陽花學運的啟蒙種子，敢毋是親像伊這款的人格者，恬恬無聲無說掖種佇歷史荒原中間，佇史實夆解碼還原了後，往過夆包裝過的史觀，終規尾龜跤趖(sô)出來矣。今仔日切開時間的內層，會當真明顯看著張教授釘根的痕跡，這也是逐家數念伊的因端。
寫到遮，一面回憶往過佮張教授做伙鬥陣的tsha̍p-tsha̍p滴滴，一面端詳伊的遺照，從今以後，阮對伊永久的印像，該當是伊揹(phāinn)彼件「嘉義人」冊包、伊的面頂展開滿足的笑容、伊的目珠瞇瞇做一線。向望伊佇彼个國度裡繼續閣一擺記錄塊欲改朝換代動亂的歷史故事。