今仔曰誠榮幸來參加「2戰末期日本琉球人疏開來台灣的故事」，陳教授愛我來講寡話，佇兩位大欉松仔樹，陳文松教授、松田記者面前，歷史是in的專業，ah我假若關帝爺前得欲舞關刀，見笑啦！阮干焦也當kā阮細漢時陣柱着的經驗講出來分享予逐家知影爾爾。
日本八重山每日新聞記者松田良孝先生，伊是對石垣島上僅存祖輩耆老或孫輩少年人喙中才知影in夆疏散台灣一段心酸故事，毋才一路走瑞落來。佇2006年6月，伊率團來訪麻豆疏散地，張良澤教授就kā 1944年及1945年吳新榮日記中，數處提到空襲中佳里疏散民–琉球人的紀事，送乎松田，並轉來佳里訪問，訪談後伊寫出由《吳新榮日記》看沖繩人的疏散體騐一文(由張良澤教授譯)。
1944年7月7日，日本帝國政府決定kā沖繩縣一帶的南西諸島的老弱婦孺共計疏散十萬人的計劃。對那霸等沖繩本島疏散八萬人到九州，對宮古地區（宮古島為主島）佮八重山地區（石垣島為主島）疏散二萬人到台灣。台南州受美機轟炸，佇琉球人疏散來之早前就受零星掃射啦，佳里已經接納台南市區的疏散民，所以佳里受到大轟炸了後，佳里人麻愛疏散去庄跤，所以琉球人煞變成疏散民中的災民，in蓋狼狽可憐，hông深深的同情。
我是1938年慶祝南京陷落炮仔聲中出世，就是彼亇囂俳(hiau-pia/hia-pai)閣目眉八字開的山豬將軍所講的日本皇民無毋著，毋過，伊用侮辱鄙相的口氣，乎阮深深的反感，伊不過是食台灣米60外冬的米虫爾爾，閣敢講話五三四，那咧乞食趕廟公？1945年4月4日，我入學小學校一年，干焦一个外月就疏開位將軍庄去。因為這陣美國空軍䦕始轟炸佳里地區，這是早前三月初一地氈式轟炸台南了後紲(suà續)落來上北一路轟炸掃射無所不至。1945年五月十日，佳里大轟炸，明治糖廠、台灣拓殖、農業倉庫、商工銀行、國民小學校、宏仁醫院、榮階醫院，受著全面燒毀。五月十六日，阮就疏開位庄跤將軍庄去了後，阮阿爸家已留一口防空壕，kā三个防空壕(fángkōngháo，1945年一月九日的日記記載)欲讓乎五口灶三十外人的琉球人覕(位佇小雅園１、２、３、４)，阮兜隔壁麻有幾戶放空營規半冬疏開去較庄跤，煞予琉球人咧蹛(tuà) 。琉球人較散赤，矮矮仔烏焦瘦，普遍營養不良，閣gâu 破病，尤其時常觸著瘧疾，阮老爸往往無kā in 收藥費，伊聼說有一位へ先的會曉畫油畫，就請hit位先的畫阮三冬前才三十歲出頭就過身的老母。會記得有一工阮老爸kā阮兄弟仔講下晡有一位琉球人會摕(the̍h)恁阿母的油畫來，拄仔好是我去接接的，就是這張32×22吋的畫，畫踮(tàm)一片美尼亞三夾板頂懸，說明hit當時物質不止仔欠缺。
石垣島佮附近小島，伊的歷史、經濟、觀光、國防應該由松田記者kā詳細說明，我代先簡單報告一下，石垣島距離台灣干焦270公里，面積222.6平方公里，是沖繩縣內沖繩島和西表島外的第三大島，現此時島上人口量約有4萬5千人(佇1945年有2萬外人)，佮這馬佳里區的人口差不多仝款，這馬已經有一个旅行社「和昇會館」，去年才開發這个觀光點，乎少年人的浮潛的好所在。hit當時，日本皇軍已確定美軍是跳島進攻，美軍那收復菲律賓了後，下手定著位琉球(沖繩)島來，所以佇1944年9月6日，日本皇軍Kâ全島2萬外人搬徙來台灣，彼當時佳里有分配兩百外人，大戰結束了後，遷送轉去的賰 (tshun) 1萬外人爾爾，聽人講纏著malaria(瘧疾)死亡八、九千人。
Paradisic - 小雅園 2.0 
你必須登入才能發表留言。