好膽莫走-1


敢是人孤單,抑是啉咖啡茶,暝時盍(khah)會赫爾長啊?半眠半醒時陣,聽著「變查某人矣!」的歡喜聲,就精神過來,愣愣(gāng)到天光。昨暗白菱得欲轉去伊房間的時,頭仔犁犁那(ná)毋情願走的款,捷捷交代歇睏的時陣著愛過–去-喔!我定著害伊kho̍k-kho̍k等,姑不而終面皮激厚厚共隔間門拍開。
「白導遊,白導遊!」我的心肝頭噗噗tsháiⁿ,那敲門那用溫柔的聲說叫伊。
「……!」無聲無說,恬恬恬!敢是人走咯(lòo)?
第二片門實在是無閂咧,輕輕仔捒看覓,人已經無佇咧!咖啡桌頂留落來一張批。
趙先生:
翻點,目睭猶金金。昨暗期待你含笑過間來,拍算蓬門為君開,盍(khah)會變按呢生?為著自尊,我就下性命趕轉去揣阮兜的阿媽、阿母,予怹挲挲咧。
九點半進前我會倒轉來。這塊白絲仔布,罔收起來,這是得欲試看在室女的齣頭。我有權愛一个人佮做愛做的代誌,敢講毋是?請共我講,愛一个人有迹爾仔艱苦?
白菱 6.30AM。
害啦!人是認真的,無風起湧,無代無誌惹坱埃。顧慮著釣,趕緊就寫這張批。

白導遊:
歹勢!阮兜有急事著愛緊轉去,頂晡(poo)的「鼓浪嶼」無法度去,後日有機會閣請幫忙。這擺旅遊深蒙妳細膩的導遊,講解專業的歷史故事,予我得真濟,真勞力!勞力!導覽的薄禮通收咧。雖然咱相差一个世代,並無阻擋咱的思想溝通,毋過妳有一點仔先進的思想實在予人綴袂著的感覺。
本成掠準妳是清涼平靜的潭水,無疑悟覕著一腹燒熱的火,也有一个無夠熟的愛,著愛知影,強挽的瓜袂甜。毋通為著結果來怨歎,該當為著往過的代誌微微仔笑。
趙 7.30AM
跳上計程車,那飛的駛去機場。車內空氣誠悶,拍開車窗,一陣絞螺仔風,共我手掌中的絲仔布佮批信捲走,司機目金,問我敢愛停車。我講:「免啦!一直走!」嘛好,猶毋知是禍也是福,就予伊自由四散了了!話頭講轉來,一點仔袂使見怪伊冷冷的面腔(tshiuⁿ)卻有熱情的心肝,凡勢伊共我的話語當作暗示,錯誤佇我,對猶未足熟似的查某囡仔面前講話較無站節所致?飛機安全降落高雄機場了後,一粒心肝才定–落-來。接紲–就坐地鐵對美麗島站第2出口傱出去,路邊角的咖啡廳,拄咧放送「好膽你就來,…來…來矣」的搖滾歌曲,予我驚一趒,掠準猶閣佇廈門咧。

輾!閣輾(lìn/liàn)!踅(se̍h) –入-去啦!逐家作伙咧喝咻。佇第十二洞發球台,我攑八號球桿,屈勢使力ka揮出去,那得著神助,白球直直飛,拄好落佇洞口前三尺的所在,接紲真乖巧就輾入空內。這時陣我體驗毋捌過的爽快!親像已經掠著一世人上神奇的物件,也無心神去拍後尾六洞,倒轉去球場大廳。相連紲的炮仔聲,phī-phī-phia̍k-phia̍k陳袂煞。經理巫先生tshuā一排桿弟,面仔笑笑,一面遏(at)手,一面共一桿入洞的獎盃佮一桿入洞的保險金6000元人民幣送予我,下暗閣會當免費蹛入去球場邊的別莊。
共紅包送予桿弟了後,我佇球場餐廳宴請朋友。欲暗時家已一人坐拍球車到別莊去。陽臺前,有那毯仔的草坪,深籃的天頂幾偌蕊無徙動的小白雲,向暗時的夕照,除起暗歸的飛鳥外,那秋仔尾欲暗仔的恬靜無聲,敢毋是我眠夢所愛的靜休所在?我真貪心盡情ka享受!彼時陣共我家己講,我確確實實是咧渡假咯。日後三工若攏欲拍球實在是誠過頭,我著愛改變行程,所以拍電話請教櫃檯經理,敢會使推薦一位有文化水準的導遊tshuā我去觀光兼考古。想袂到李經理真緊就共我回話,伊輕聲細說:「阮的表姐姓白,伊是歷史碩士專業,這馬拄咧學習博士專業,伊無導遊經驗,閣請一位地陪就會使–得,好毋好?」這款的自助旅遊歉采所費真懸,嘛傷過奢華咯?毋過,無意中提著保險金該當按呢賞家己。所以阮相約明仔載9.00AM跤兜佇球場大廳見面。

「白小姐,妳好!我叫趙書,請問芳名?」生分話拄講煞,伊現變面!
「歹勢!佇臺灣小姐是一款敬稱,遮的是指酒家女。」伊的經理表妹按呢共我說明。
「我叫白菱,猶咧學習。」一軀粉紅色洋套裝的穿插,射出女性魅力。伊應甲真簡單,氣(khùi)口嘛真普通,態度認真親像老師。阮就照李經理的說明倩車去博物館。
「為啥乜?你迹爾愛拍高爾夫球?」伊講。
「見若攑頭ka看覓,就會當看著彼粒小白球盤過天邊的弧線,敢毋是足媠氣的?」
「拍球有啥乜好空的,按怎才拍會好勢?」伊憢疑講。
「這款運動會當鍛鍊思考、平衡、抗壓的力量,尤其步輦予下盤勇閣有力,猶會當臆(ioh)出人的老實度。上要緊是予咱頭殼有一時陣的空白,暫時無煩無惱。標準是七十二桿,拍愈少桿的人上贏,若欲掠拍球的芒角,就愛揣gâu的師傅咯。」
「按怎看出彼个人老實?」伊淡薄仔目頭結結,青疑講。
「拍球若是偏飛傷濟,時不時會走去四邊無人的所在,不論場所是按怎歹空,攏總袂使徙位,徙位著愛罰一桿,彼時陣干焦天公伯–也才知影伊家己咧創啥乜?」
「聽甲霧sà-sà!我的表妹講你昨日一桿入洞,敢就是拍球上懸的境界──畢業咯。」
「毋是!純粹是好運,這佮段數懸低無關,濟桿的人嘛有機會。對業餘的拍球人來講,若每桿拍出去的小球會當直挵宋閣拋甲遠遠就會使咯,每一洞桿數若會當比家已的本底記錄較低就爽咯;莫計較分數,也無壓力,球技就自然咧進步,這就是高爾夫球予人趿心(sannh-sim)的所在。」

博物館內有收藏豐沛的玉器、陶瓷器、漆器、石雕、書畫,小可ka瞄一下就行過去。我對「三寸金蓮」較心適,看板寫「拄才消失足媠的古文明」──自五代李後主開始,貴族宮廷裡的貴婦參樂戶歌妓,就有縛跤穿尖頭翹頂鞋仔的慣勢,宋朝時行後,明朝中期達到高潮。場內展出真濟的圖片、相片佮清末、民初時期的實物,攏總五花十色,媠甲無得比。其中有江西九江市,拄才出土的一雙弓鞋,是經過四、五百年猶保存好勢的明代三寸金蓮。
白菱親像咧背書,比手畫刀講:「 是按呢縛跤的?除起大跤指外,四指仔攏向後面內拗,跤掌內外邊嘛ka對拗,跤蹠底變成深溝,紅牙牙、幼綿綿,雙跤真少運動,予密密包紮的跤掌底煞變成性的敏感點。小跤腿的筋肉變較幼秀,著靠尻川斗佮大跤腿掣動身軀向兩爿搖hián(搟),長時間落來,毋但尻川斗筋肉發達,陰道橫隔筋肉也變較強壯有力,煞予鬆冗的膣腔變較絚(ân)。」
我細膩向頭瞄伊親像茭白筍的小跤腿,拄好的小跤配搭著巧媠的懸屐仔,誠符合審美的規格。我就按呢膨風一下:「時到今,縛跤共伊當作一種古老的美容術,並無佇世間絕跡,卻是用無仝的變步恬恬仔延紲落來。現此時的懸屐仔、肚皮舞、扭扭舞、草裙舞、國標舞、呼啦圈、森巴舞等等,攏總是咧加強尻川斗的功力。穿懸屐仔予查某人徛直腰身,小跤腿看起來較抽長,嘛予身軀變較挑俍,行路体勢變妖嬌好樣。若跤踏仔二吋懸對健康上有幫贈。」
接紲–落-去,阮就去看「考古發現」。這時拄好展示「江西銅器特展」。唯商周、春秋戰國、兩漢、隋唐、宋遼金元至明清等時期的禮器、樂器佮生活用品,工藝精巧,目睭看袂盡。較好耍的一面半爿的銅鏡,是南朝後主陳叔寶的小妹樂昌公主佮伊的翁婿徐德言,佇隋朝滅陳朝的時,兩人走散了後,提半爿的銅鏡走揣對方,經過千辛萬苦,終歸尾破鏡重圓的故事。江西省向時發現的半爿銅鏡攏是唯宋墓內出土的,2001年這擺是唯唐墓發現的。古早人坮葬的慣勢是共銅鏡拍破由序細佇死者翁某的棺材內囥半爿,毋過到今猶袂揣著兩爿拄峇峇(bā)的破銅鏡。
考古家發現上金貝村的古墓就是「靖難之變」的建文帝的墓仔。也有千外年的建築「木拱廊橋」。閣有一、二千外年的「閩越國」。猶有規千萬群的「土樓」。
若欲斟酌ka看覓,規半晡嘛看袂了。頂面四項攏愛現場去看覓才有意思。所以阮就趕緊到旅行社,經理安排阮這馬坐高速火車到福州市的旅館佮當地的地陪面會。明仔載才坐包車去耍。

隔轉日透早,阮坐麵包車對寧德市出發。車過上金貝村,上北量約行四十外分鐘,現場佇海拔350外米懸,半山腰的樹林內。規座墓地200平方米,唯內面到外口,分舍利塔、拜亭、墓坪3部分。墓形用弧線條石砌成真懸的圓拱,墓前石柱懸約4外米,墓壁邊刻雲紋龍頭石雕。
白菱按呢講:「墓的結構佮格局逐跡攏展現出皇家的氣派,墓埕逐種配件幼秀豪華,會使斷定這是皇族的墓仔。」紲–落-來伊指著墓塔碑頂刻的“御賜金襴佛日圓明大師第三代滄海珠禪師”講:「伊真實身份就是明朝第二位皇帝建文帝──朱元璋長孫。甯德華嚴寺珍藏一軀明代雲錦袈裟,是明永樂早前製作,袈裟下半身內底用宮燈針繡福壽的字樣,袈裟胸前頂面有九尾龍,下面有五尾龍。遮的證據佮古墓,證明建文帝上尾後覕佇遮過身的。明史第一謎案終歸尾會當托破咯。」
接紲–阮就去看長橋村的「木拱廊橋」,地陪按呢講:「萬山之縣的福建屏南縣,逐迹攏有連綿彎曲閣尖幼幼的小山,佇溪溝直橫交葛,親像倒佇山溪的古早木橋,經過天變地變,煞成心適的一幅圖。縣內保存較好的木拱廊橋有13座。長橋村的溪頂有大陸上長的木拱廊橋—萬安橋」
白菱補充說明講:「伊無用寸釘片鐵,干焦憑榫卯(sún-báu)銜接,短短仔材料,卻鬥成了誠大跨渡(kuà-tôo)的橋粱,親像《清明上河圖》裡的汴水虹橋,現此時干焦賰閩、浙地區才有木拱廊橋的構造。木拱廊橋是當地百姓交通要道,佇橋頂起厝的長廊式設計,毋但擋風遮雨,猶閣適合聚會開講,平常時有真濟人佇橋頂咧行棋、拍牌。」

隨後阮就踅到西爿的武夷山風景區。白菱強調:「伊是國家級重點風景區,已經列入『世界人類文化自然遺產』之一。若踮遮柳柳仔來耍二、三工,唯九曲溪上游坐竹排仔順流落來,行路或者是坐轎足百山,才會當看出山勢、溪水的媠。古代僰人往生後,共棺木掛踮武夷山九曲溪兩岸的懸崎(kuân-kiā)山壁頂,到今猶留有『懸(hiân)棺』十外跡。『閩越古城遺跡』攏總四十外萬平方米,這馬干焦賰有地基,佮一寡城壁遺跡。」
下晡,結束閩東的旅行,阮足忝頭的、煞佇火車頂補眠。暗時九點才趕轉來廈門。

今仔日頂半晡阮就去參觀龍岩區的土樓。地陪逗逗仔序(sī)講:「永定的圓樓仔上大座的是『承啟樓』。伊的直徑73外米,外圈4棧(tsàn[層]),第二圈2棧,第三圈是單棧,中心是祖堂。準講是阮佇『承啟樓』的逐个厝間蹛一暗,著愛一冬外的時間;逐工捌一个人,著愛兩冬外的時間。」
白菱補充說明:「土(thôo)樓有方樓也有圓樓,方樓較濟,毋過圓樓比方樓較節省建材閣利便防衛。土樓建築佇客家人唯中原搬徒來福建、廣東的進前,閩南人早就起土樓,毋過較出名的幾个土樓仔攏是客家人咧蹛,煞予人叫做客家土樓。」
遐的『土樓』群,傍山倚勢、百姿千樣、古樸媠氣。伊的建築風格佮埕斗穩重高貴的藝術造型,予阮呵咾甲觸舌。

 

廣告

發表迴響

Please log in using one of these methods to post your comment:

WordPress.com 標誌

您的留言將使用 WordPress.com 帳號。 登出 /  變更 )

Google+ photo

您的留言將使用 Google+ 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s