「彼是我走路兩冬前的代誌？」超資深深吐大氣講：「真後悔彼當時無聽你的苦勸。」
春吉仔Tshun-kiat-á連紲講：「會記得你講提早一禮拜下種子，嘛早一禮拜收成，就會當趕早市，通得著較懸的價數。」
「聽人—咧h講咱南台灣，著愛佇立冬 (農曆九月初)即工下種子仔。」超資吞一个喙瀾紲suà咧講：「彼我毋信邪按呢講管待伊，就叫你共種落去。」
「我抝袂過兄哥你的鐵齒，勉強共種仔下落去。」春吉誠冤屈講：「這是違背了大自然法則，三、四月日後，咱挖出一欉欉細箍佮粉紅色緻的菜頭仔，煞變成將軍鄉庄跤流傳真久的笑詼。」
「自然界有看袂著的『節氣』咧控制生物的成長。基因註定生物的生死外，若欲活甲逍遙自在，伊的『氣』拄好佮季節的『氣』相仝。」超資kā伊當做按呢生án-ne-senn來解釋。
「你的比喻不三不四，猶毋過有幾分仔道理。」慧玉感嘆講：「原來伊「生猴(莽撞)的代誌以早就有—啦！」
超資Tshiau-tsu輕聲細說又閣講，伊想欲聽「家後」這首歌曲。真緊錄音機就放送低音慢板，包含一點點哭調仔的女聲：
「有一工咱若老，揣無人共咱有孝。
— — —
我共青春嫁佇恁兜,
阮唯少年綴你綴甲老
— — —
人情世事已經看透透,
有啥人比你較重要？.」
憂傷的歌聲，親像咧細說慧玉的過去，伊一時仔失神,煞頂面幾若小段落鉤去矣.
「等待轉去的時陣若到,我會予你先走，
因為我會毋甘放你為我流。
— — —
你的手，我會共你牢牢，因為我是你的家後。」
煞尾超資鬥陣合唱：「妳的心我會永遠記牢牢，因為妳是我的家後。聲聲句句直直透入慧玉的心肝頭，引起滿腹的心酸，予伊的目屎敢若珠淚㴙㴙滴袂熬！
哲雄、春吉攏總感染著一款稀微咧欲離別的心情，怹就喉滇，嘛綴咧目屎泗淋垂涕泗縱矣！無疑悟煞變成彼款的情景，昌勳就緊手宣佈今仔日的告別式通收煞了矣。
隔轉日顛倒較有精神。親人的恩情較大天，加添目屎流，目屎滴，會當療傷止疼。慧玉幾若月日來心肝頭茹冗冗雜亂,這馬心情變較輕鬆，毋才有心思共纓纏的線頭抽出來，通數念的過去。
一九六六年十月，超資就來k巴西國的里約熱內盧。拄才開始，伊佇一間日裔農場做粗工，捌小可仔葡萄牙語半冬了後，才改途做貨櫃車司機。彼時伊hit-sî佮慧玉佇教會熟似，三冬怹嘛佇遐結婚。伊愛固定每禮拜一擺到碼頭，分別開三逝貨櫃車。第一班押送到離港區六十外哩，老板彭志雄的倉庫間仔。另外第二班押送到地區軍事司令指定的倉庫間仔，第三班n才押送到港區的倉庫間仔，Kā漚貨假無意予海關沒收充公的走私貨。有一工超資著愛顛倒順序，代先共二口貨櫃押送入官方的倉庫間仔好勢，聽候第三班才押送去彭老大的倉庫歇睏等待天光才拍算。無疑悟匪類公然共一台卡車連貨物強搶去了了—矣。害伊賠甲咧欲褪褲底，連回到國外去啦！
有夠厭氣！彼款了錢的代誌，按怎會離奇的發生佇怹兜內底呢？今仔日慧玉嘛收著一張巴西國傳真來的批信。─
敬愛的姊夫、阿姊：
接著傳真來的批信，十二分驚惶，連鞭就買飛行機票，預定初六轉去到台灣。路途真遙遠，恐驚袂赴相見面。所以代先報告一个大條的代誌。彭志雄先生已經佇頂月日底往生。進前我佮曉月相招去看病人，伊共阮明講囥佇心肝底三十外冬足後悔一个天大的秘密，伊姑情阮按呢講：「無論如何愛共姊夫、阿姊會失禮。彼當時仔因為伊怨妒姊夫的才情，毋敢看重伊，原本拍算，佇姊夫運送貨櫃到位港區倉庫間仔的時陣，承紲用走私罪名予人收押。落尾手伊家己天良發現，改成自導自演搶家己人的貨車。」原來是伊一手咧變猴弄(pìnn-kâu-lāng)予姊夫差一屑仔就倒貼本錢，好佳哉毋免食櫳仔飯。
姊夫、阿姊千萬愛保重，等待我佮曉月倒轉來âi。
弟洪奕初 筆 05/03/2008
一目nih仔，超資蹛佇巴西國嘛六冬外。伊看勢面嘛無前途，就按呢辦理「投資分公司」的身份移民美國。伊的結拜小妹阿惠仔是一个會計，二十外冬前，伊欲申報公司營業所得稅才結緣的。連續三冬了錢猶閣愛做假數，顛倒申報趁錢，才會使繼續保存公司移民的身份。馬律師代替怹申請入美國籍失敗，煞予伊不止仔鬱卒。姑不而將就來轉途，考上廚子師父執照，蒙特利爾公園市(Montreal city)開設「悅園餐廳」，才重新提出入籍申請。見若到中晝頓的時，阿惠仔攏嘛無細膩透過隔間的玻璃窗仔，看著伊的形影，縖圍軀裙(uî-su-kûn)仔，舞動菜刀、煎匙(tsian-sî)，足有大廚子師司的架勢。定定看著伊激力咧剁 (tok)肉，若親像看著寃仇人的臭面昌，毋知影咧唸啥物？
「大兄敢毋是唱軍歌？」阿惠仔問外頭作穡的慧玉姊。
「毋著，伊干焦咧餾(liû)彼兩句，『切恁娘的白肉』『剁(tok)恁娘的肉骨』的話爾爾。」慧玉按呢應。
原來超資煞尾擺申請入籍面談的時，移民官足無客氣共伊剾洗，按呢講：「你的學位是國立台灣大學畜牧系，煞佇巴西國做看顧花園的工課、佮貨櫃司機。然後到美國做進口海產分公司的負責人，這馬變「悅園」負責人兼廚子司父，學歷、經歷敢若是假的。」入籍申請煞予人夆駁回。莫怪超資作穡的時陣，沿路切肉沿路咧唸經。
彼一工，奇妙的代誌發生—矣。一位阿啄(tok)仔，三不五時伊是「悅園」的人客，真拄好伊佮阿惠仔仝桌仔坐做伙。
「這間的台灣菜真好食，會使的話，我想欲熟似(si̍k-sāi)廚子司？」阿啄仔呵咾甲觸舌。無偌久慧玉請頭家出來。
「你好！我是強納森(Jonathan)，你誠gâu煮食，著愛Kā你致意。」伊徛起來用倒手爿大頭毋比出讚！閣伸出正手爿那遏手那咧開講：「咱佇佗位敢若捌(ba̍t)相見過面？」
「免客氣！叫我大偉(David)。」超資冷淡淡按呢應喙：「我嘛感覺有一屑仔面熟？無毋著，你親像是約我面談的移民官？」「著—啊！我想起來—啦。」強納森輕手拍家己的頭殼碗咧講：「毋才二禮拜以前的代誌，看來你會曉煮食是誠實的，嘛是一流的廚子司—咧！」
超資才有一點仔笑神紲落去伊才講：「因為英語講袂輾轉，遮的攏是我誠實學歷、經歷，一時半刻嘛無法度解釋予清清楚楚。」
怹全家，到尾仔重新審查入籍好勢。超資這馬足數念阿惠仔熱心幫贊人的形影，若是會當閣再見面，毋知影偌好—咧？想—例，想—例，拄好聽著下面這張傳真批信。
敬愛的大兄、大嫂：
我是阿惠仔，原本該當轉去參加告別式，毋過，阮的會計公司拄著報稅期間足無閒，一時半刻無法度轉去，實在失禮。
猶記得大兄入籍的代誌，遐是十六年冬以前遲到的聖誕節禮物。總是天公疼憨人，嘛予咱好運拄著，體會世間上蓋美妙的故事。強納森佮意台灣菜揣到「悅園」餐廳嘛是天意，會當予恁閣再熟似，我干焦是順水人情爾爾。
小妹祈禱你得欲安寧，一路聊聊仔是行—啊！
妹曾美惠 寫 05/03/2008
※我已經改變了心意，訂初六機票轉去，初七半暝會當達到台南。
05/03/2008
佇入籍成功了後，超資盤出餐館廳，就大膽轉業。八0年代中期，台灣移民大量搬徒入境來。把握罕罕見的機緣，伊就買賣「公寓」。伊唯無半撇的厝跤、管理員做到經理。開始幾个單位，擴張到上百个單位，進一步做牽猴仔買賣，嘛共抽頭(thiu-thâu)變成股份。干焦四年冬光景，就按呢變成公寓大王。
伊佇美國的煞尾十二年，發展其他的領域，轉向買賣商場，起頭管理小規模的商場，伊經營甲不止仔出色。尾後伊大心肝買了一个六6百單位大的商店，無疑悟『痟貪軁鷄籠』(siáu-tham nǹg ke-lam)，煞予一間日裔房地產公司設局中計，足足拍phah了十年冬的官司。超資佇六冬前就共伊的囝兒講，怹愛準備去學法律。
「咱就是毋捌法律，官司猶未輸贏進前，咱就共300百萬美金送予一个猶太人律師團的橐袋仔(lak-tē-á)去—矣。毋過，官司猶閣咧膏膏纏走袂離。」彼時超資氣怫怫 (khì-phut-phut)按呢講：「恁lín兄妹好好去讀法律學科，後日，通予鄉親序大利用母語參詳代誌，勿閣開冤枉錢。」
超資回想同甘共苦的一對囝兒，離開怹嘛過了一年冬，心心念念深深的情，愈來愈重，紲落來才聽著上蓋歡喜的傳真批。
敬愛的阿爸、阿母：
阮已經拍初五機票轉去，台灣時間初六半暝會到台南。真想連鞭飛轉去恁的身軀邊，報告官司的雜雜滴滴。阮服務的律師團的確有把握共[kā給]「HAYASI不動產公司」為著洗錢、詐欺罪名敗訴。纏絆十年的官司終歸尾會當收煞了。阮嘛共[kā向]股東報告官司的進展，得著怹的呵咾佮諒解。無偌久法律得欲還咱的公道，到時照阿爸的吩咐，阮會共[kā把]銀行凍結咱私底下的百萬錢銀，照額分攤賠予股東。阿爸就會當清清白白離開咱逐家。懇請阿爸定著愛堅強等咧，阮會陪伴恁未來的新婦[sin-pū媳婦]、囝婿做伙倒轉去。
兒 念 臺 女兒 念 南 敬上 05/04/08
這張傳真，煞予伊歡喜甲歸暗袂睏得。等待怹轉來的時，就達成告別式上大的心愿了。
隔工，伊嘛聽著上惜情好友的傳真。
致陳超資兄嫂：
好鬥陣、好客情[好客]、愛雜插的兄弟呀。咱是豬年仝水仔生的，青少年時代予人禁止游泳、跳舞。十外年前，咱倆个六十幾的老歲仔，作夥學電腦、參加家庭舞會、才會曉佇海墘仔泅水。你「固執」甲共[kā把]真話當作耳仔風。我淡薄仔捌「陽宅風水術」，你就是不信邪，佇阿凱迪亞市的大厝宅，後壁是落崎的山坪，這是「散財的格局」，你毋愛聽袂使蹛佇遐上四冬的用心苦勸。雖然風水地理無法度用科學，共後尾做一下發生的代誌交待清楚。敢講毋是運命咧叫咱選擇地理，抑是地理咧影響咱的命運？
咱攏知影你猶有至情至義的一面。見若聽著「阮的母親就是台灣」這首歌的時陣，你的手巾攏嘛澹澹濕濕。上感心的，你嘛歡喜參加擁護台灣的民主運動，攏慷慨咧出錢閣出力。頂日仔念臺來共咱講官司的進展，無偌久司法得欲還你的清白，上歡喜終歸尾會當坱埃[ing-ia塵埃]落定。雖然咱誠毋甘投資攏總烏有去，毋過咱一點仔嘛無怨嘆，顛倒教示咱即代移民知影法律常識。你的人生這齣戲，搬甲誠艱苦，阮的心肝底一定會留下落來你正港「男子漢」的形影。阮翁仔某已訂初六機票轉去，初七若袂赴「告別式」的時陣，向望你慢慢仔是，寬寬[khuann-khuann從容]仔起身啊！
弟 黃建德 敬05.05.08
黃先生寄來的傳真二工了後。親情五十做一到位，圍倚去超資的身軀邊，伊才甘愿共目珠皮瞌起來。除起伊的喙角猶有微微仔掣[tshuah抖動]一咧，就申[tshūn剩]一絲絲仔若有若無的倒逆氣，才知影伊猶閣佇咧。靜寂寂親像時間、空間定定佇遐。漸漸，伊的面肉反烏閣來反白，咱才穩心看著伊文文文行矣。
昌勳輪調「安寧病房」嘛得欲結束。伊得著的誠濟，猶毋捌的也袂少，總著愛用寡時間閣來學習醫學倫理佮人情義理。伊知影，欲按怎幫贊患者心內會當得著安慰才是上要緊的。所以欲按怎予患者化解對往生的「驚惶」，欲按怎叫醒得欲化去的神魂。「往生前告別式」，嘛是予性命閣燒烙[sio-lō溫暖]起來的機會，雖然性命的火舌[hué-tshi̍h火苗]開甲遮爾仔短，該當是尊重性命值得推薦的辦法。遮的患者親像跋落無底深坑，被迫吞忍遮爾仔濟的苦慼[khóo-tsheh痛楚]，現出無奈何的「勇氣」，咱著愛共[kā向]受盡托磨的怹致上大的敬意！
(2009-12-22 發表於《鹽分地帶文學》第25期)
Paradisic - 小雅園 2.0 